راجع مُستشارك

دايمًا بيمر علينا مواقف أو فترات وبنبقى ف أشد الحاجة لدعم من حد جمبنا محتاجين نستشير شخص كان مكاننا في يوم من الأيام بس نصيحة مني ياريت نستشير أهل العلم والشورى الناس المقنعة الملمه بأمور الدين والدنيا بلاش ناخد رأى أى حد والسلام لأن أنا مش أنت ولا أنت أنا كل واحد فينا له دماغ مختلفه كل واحد فينا بيفكر بطريقته هو والموقف اللِ أنا اتحطيت فيه غير موقفك وتجربتي مش تجربتك وغيره كتير

في منا إللِ بيستسلم وفى إللِ بيواجه وفى إللى بيعافر وفي ..

ف الخلاصه أن تجربتك انت اللى عايشها مش أنا فمهما تحاول تفهمنى مش هفيدك بشكل كافي هيبقي دايمًا في قصور ولن أصل لما تريده تمامًا يمكنني نصحك وتوجيهك لكن لا يمكننك القفز بواستطي 

وبمناسبة أهل الشورى متروحش لواحد فاشل ف حياته المهنيه وتقوله أنا عايز اطور من نفسى علشان اشتغل الشغلانه إللى بحلم بيها فمتتفاجأش لو كان رده وتتعب نفسك ليه أحنا ف بلد الوسايط ومهيشتغلش غير ابن المحافظ وابن وابن وهكذا

متروحش تجيب واحد هو وأخوه دايما بيتخانقه يصلح بينك وبين أخوك 

متروحش لواحد أهمل ف دراسته ومحققش ذاته وتسأله انجح ازاى ف حياتي طبيعي هيقولك يا ما ذاكرنا وأخرتنا ع القهاوى اقعد ي راجل نفض دماغك

متسمعش لواحد يقولك الجواز دا قيود وخنقه وهو بنى آدم معقد

متسمعش لصاحبك إللى بينم على صاحبكم التانى لأنه بينم عليك انت كمان

ربنا ميزنا عن الحيوانات بنعمة العقل ف نعقل الأمور ونفكر صح 

ف النهايه كل حياتنا دروس وتجارب والمفروض نتعلم منها كل المطلوب مننا هو السعى ورب العباد هو إللى بيسير الأمور

لو عايز تقتدى بحد فخير قدوه هو رسول الأمه المبعوث فينا عليه أفضل الصلاة والسلام  

الكاتبة/سيدة خضررمضان محمد